us ko jaane de agar jaataa hai — Faisal Ajmi

main zakhm khaa ke giraa thaa ki thaam us ne liyaa
muaaf kar ke mujhe intiqaam us ne liyaa

ab vo titli hai na vo umr taaaqub vaali
main na kahtaa thaa bahut duur na jaanaa mire dost

kabhi dekhaa hi nahin us ne pareshaan mujh ko
main ki rahtaa huun sadaa apni nigahbaani mein

harf apne hi maaani ki tarah hotaa hai
pyaas kaa zaaiqa paani ki tarah hotaa hai

TuTtaa hai to TuuT jaane do
aaine se nikal rahaa huun main

dukh nahin hai ki jal rahaa huun main
raushni mein badal rahaa huun main

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

ruuh kis mast ki pyaasi gai mai-khaane se
mai uDi jaati hai saaqi tire paimaane se

tilaai rang jaanaan kaa agar mazmun likhun khat mein
to haala gird harfon ke bane sone ke paani kaa