nahin charaagh jalaaeinge ab kisi dar par — Fatima Mehru

jaisaa ji mein aae vaisaa kar jaanaa
itnaa bhi aasaan nahin hai mar jaanaa

ik nazar sarsari do chaar zaruri baatein
ghar mein rakkhaa koi akhbaar samajhtaa hai mujhe

ik ghaDi mujh ko chaahiye aisi
vaqt jis mein tamaam teraa ho

kuchh nahin maangte magar kuchh log
kuchh nahin chhoDte hamaare paas

tabhi to dhundli hain us ki meri tamaam raahein
vo mujh ko kohre ki chaand raaton mein sochtaa hai

main ek vo huun jo aap khud se bhi mukhtalif hai
main vo nahin huun jo aap mujh ko samajh rahe the

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

mohabbat phuul banne par lagi thi
palaT kar phir kali kar li hai main ne

kuchh aur vus'atein darkaar hain mohabbat ko
visaal-o-hijr pe daar-o-madaar mushkil hai

tazkira soz-e-mohabbat kaa kiyaa thaa ik baar
taa-dam-e-marg zabaan se miri chhaale na gae

niind ke ghar mein hain khvaab aane lage
'ishq hai naachtaa aankh ke sahn mein