miraa rotaa bachcha bahaltaa thaa jis se — Fay Seen Ejaz

main kahaan aayaa huun laae hain tiri mahfil mein
miri vahshat mire majbur qadam aap hi aap

ab ke ruThe to manaane nahin aayaa koi
baat baDh jaae to ho jaati hai kam aap hi aap

mil rahi hai mujhe naa-karda gunaahon ki sazaa
mere maalik mire sajde mujhe vaapas kar de

yahi din hain barat le jitne zevar teraa ji chaahe
Dhalegi umr to ye chaandi sonaa kaun dekhegaa

koi to zid mein ye aa kar kabhi kahe ham se
ye baat yuun nahin aise thi yuun huaa hogaa

tujh ko manzur nahin mujh ko hai ab bhi manzur
meri qurbat mire bose mujhe vaapas kar de

main baDaa ho gayaa huun magar bachpanaa
mere dil se kabhi bhi gayaa hi nahin

ajab kyaa hai jo nau-khezon ne sab se pahle jaanein diin
ki ye bachche hain in ko jald so jaane ki aadat hai

nikalne hi nahin deti hain ashkon ko miri aankhein
ki ye bachche hamesha maan ki nigaraani mein rahte hain

milti hai khushi sab ko jaise hi kahin se bhi
bhuli hui bachpan ki tasvir nikalti hai

abhi to ghar mein na baiThein kaho buzurgon se
abhi to shahr ke bachche salaam karte hain

itne mein aur charkh ne miTTi palid ki
bachche ne muskuraa ke khabar di jo iid ki