abhi to ghar mein na baiThein kaho buzurgon se — Abbas Tabish

jhonke ke saath chhat gai dastak ke saath dar gayaa
taaza havaa ke shauq mein meraa to saaraa ghar gayaa

mohabbat ek dam dukh kaa mudaavaa kar nahin deti
ye titli baiThti hai zakhm par aahista aahista

'taabish' jo guzarti hi nahin shaam ki had se
sochein to vahin raat sahar-khez bahut hai

ek muddat se miri maan nahin soi 'taabish'
main ne ik baar kahaa thaa mujhe Dar lagtaa hai

main jis sukun se baiThaa huun is kinaare par
sukun se lagtaa hai meraa qayaam aakhiri hai

muddat ke baad khvaab mein aayaa thaa meraa baap
aur us ne mujh se itnaa kahaa khush rahaa karo

main baDaa ho gayaa huun magar bachpanaa
mere dil se kabhi bhi gayaa hi nahin

zabt TuuTaa to kuchh bhi bachegaa nahin
zabt meraa na yuun aazmaa zindagi

jab chali ThanDi havaa bachcha ThiThur kar rah gayaa
maan ne apne laal ki takhti jalaa di raat ko

khilaune ki taDap mein khud khilaunaa vo na ban jaae
miraa bachcha saDak par rezgaari le ke niklaa hai

bane hain kaam sab uljhan se mere
yahi atvaar hain bachpan se mere

mujh ko thakne nahin detaa ye zarurat kaa pahaaD
mere bachche mujhe buDhaa nahin hone dete