kaun pas-e-manzar mein ujDe paikaron ko dekhtaa — Gulzar Bukhari

jaane vaalon ki kami puuri kabhi hoti nahin
aane vaale aaeinge phir bhi khalaa rah jaaegaa

chalun to maslahat ye kah ke paanv thaam leti hai
vahaan jaanaa bhi kyaa haasil jahaan se kuchh nahin hotaa

zaabte aur hi misdaaq pe rakkhe hue hain
aaj-kal sidq-o-safaa taaq pe rakkhe hue hain

rang-o-bu kaa shauq aashob-e-havaa mein le gayaa
titliyaan ghar se nikal kar ibtilaa mein kho gaiin

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

maarka garm to ho lene do khun-rezi kaa
pahle shamshir ke niche hamin jaa baiTheinge