mujh ko 'jalil' kaun kahegaa shikasta-dil — Hasan Akhtar Jaleel

main na dariyaa huun na saahil na safina na bhanvar
daavar-e-gham kisi saanche mein to Dhaale mujh ko

safine Duub gae kitne dil ke saagar mein
khudaa kare tiri yaadon ki naav chalti rahe

havaa ke dosh pe uDti hui khabar to suno
havaa ki baat bahut duur jaane vaali hai

main baDaa ho gayaa huun magar bachpanaa
mere dil se kabhi bhi gayaa hi nahin

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

na ho ehsaas to saaraa jahaan hai be-his-o-murda
gudaaz-e-dil ho to dukhti ragein milti hain patthar mein

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

barsaat kaa baadal to divaana hai kyaa jaane
kis raah se bachnaa hai kis chhat ko bhigonaa hai

'saif' andaaz-e-bayaan rang badal detaa hai
varna duniyaa mein koi baat nai baat nahin