ham khud bhi hue naadim jab harf-e-duaa niklaa — Hilal Fareed

miri daastaan bhi ajiib hai vo qadam qadam mire saath thaa
jise raaz-e-dil na bataa sakaa jise daagh-e-dil na dikhaa sakaa

paani pe bante aks ki maanind huun magar
aankhon mein koi bhar le to miTtaa nahin huun main

us ajnabi se vaasta zarur thaa koi
vo jab kabhi milaa to bas miraa lagaa mujhe

aaj na ham se puchhiye kaisaa kamaal ho gayaa
hijr ke khauf mein rahe aur visaal ho gayaa

jaam-e-ishq pi chuke zindagi bhi ji chuke
ab 'hilaal' ghar chalo ab to shaam ho gai

is aql ki maari nagri mein kabhi paani aag nahin bantaa
yahaan ishq bhi log nahin karte yahaan koi kamaal nahin hotaa

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai

nahin vo sham-e-mohabbat rahi to phir 'aasim'
ye kis duaa se mire ghar mein raushni si hai

sikhaa na duaaon mein qanaaat kaa saliqa
vo maang rahaa huun jo muqaddar mein nahin hai

abr barse to inaayat us ki
shaakh to sirf duaa karti hai

qubul is baargah mein iltijaa koi nahin hoti
ilaahi yaa mujhi ko iltijaa karnaa nahin aataa

yaa-rab gham-e-hijraan mein itnaa to kiyaa hotaa
jo haath jigar par hai vo dast-e-duaa hotaa