jaam-e-ishq pi chuke zindagi bhi ji chuke — Hilal Fareed

miri daastaan bhi ajiib hai vo qadam qadam mire saath thaa
jise raaz-e-dil na bataa sakaa jise daagh-e-dil na dikhaa sakaa

ham khud bhi hue naadim jab harf-e-duaa niklaa
samjhe the jise patthar vo shakhs khudaa niklaa

paani pe bante aks ki maanind huun magar
aankhon mein koi bhar le to miTtaa nahin huun main

us ajnabi se vaasta zarur thaa koi
vo jab kabhi milaa to bas miraa lagaa mujhe

aaj na ham se puchhiye kaisaa kamaal ho gayaa
hijr ke khauf mein rahe aur visaal ho gayaa

is aql ki maari nagri mein kabhi paani aag nahin bantaa
yahaan ishq bhi log nahin karte yahaan koi kamaal nahin hotaa

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

sabhi se jab mohabbat chaahte ho
mohabbat kyon nahin karte sabhi se

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

sau fasaad ek ishq mein uTThe
boyaa ik tukhm uge hazaar darakht

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa