chaand kaa husn bhi zamin se hai — Ibn

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

likhne ko likh rahe hain ghazab ki kahaaniyaan
likkhi na jaa saki magar apni hi daastaan

husn banaa jab bahti gangaa
ishq huaa kaaghaz ki naav

zamin ki kokh hi zakhmi nahin andheron se
hai aasmaan ke bhi siine pe aaftaab kaa zakhm

ajiib baat hai kichaD mein lahlahaae kanval
phaTe puraane se jismon pe saj ke resham aae

Duub jaane ki lazzatein mat puchh
kaun aise mein paar utraa hai

aasmaan jhaank rahaa hai 'khaalid'
chaand kamre mein mire utraa hai

vo chaand hai to aks bhi paani mein aaegaa
kirdaar khud ubhar ke kahaani mein aaegaa

chaand ne taan li hai chaadar-e-abr
ab vo kapDe badal rahi hogi

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

chaand hai paani mein yaa bhule hue chehre kaa aks
saahil-e-dariyaa pe dekho main bhi hairaani mein huun

vaqt hai ab namaaz-e-maghrib kaa
chaand rukh lab shafaq hai gesu shaam