koi to phuul khilaae duaa ke lahje mein — Iftikhar Arif

main zindagi ki duaa maangne lagaa huun bahut
jo ho sake to duaaon ko be-asar kar de

hamin mein rahte hain vo log bhi ki jin ke sabab
zamin buland hui aasmaan ke hote hue

dayaar-e-nur mein tira-shabon kaa saathi ho
koi to ho jo miri vahshaton kaa saathi ho

main chup rahaa ki vazaahat se baat baDh jaati
hazaar sheva-e-husn-e-bayaan ke hote hue

subh savere ran paDnaa hai aur ghamsaan kaa ran
raaton raat chalaa jaae jis ko jaanaa hai

raas aane lagi duniyaa to kahaa dil ne ki jaa
ab tujhe dard ki daulat nahin milne vaali

dam jo niklaa to muddaaa niklaa
ek ke saath dusraa niklaa

iltijaa karte hue pyaasaa parinda mar gayaa
ab to dariyaa ko hayaa se Duub marnaa chaahiye

nahin mumkin lab-e-aashiq se harf-e-muddaaa nikle
jise tum ne kiyaa khaamosh us se kyaa sadaa nikle

sher kaa tiir kisi kaa ho agar dil ko lagaa
kahne vaale ko bahut dil se duaa di ham ne

mujhe yaad karne se ye muddaaa thaa
nikal jaae dam hichkiyaan aate aate

miraa kamaal ki main is fazaa mein zinda huun
du'aa na milte hue aur havaa na hote hue