phir khamoshi ne saaz chheDaa hai — Javed Akhtar

main paa sakaa na kabhi is khalish se chhuTkaaraa
vo mujh se jiit bhi saktaa thaa jaane kyuun haaraa

main bachpan mein khilaune toDtaa thaa
mire anjaam ki vo ibtidaa thi

ghairon ko kab fursat hai dukh dene ki
jab hotaa hai koi hamdam hotaa hai

koi shikva na gham na koi yaad
baiThe baiThe bas aankh bhar aai

unchi imaaraton se makaan meraa ghir gayaa
kuchh log mere hisse kaa suraj bhi khaa gae

tab ham donon vaqt churaa kar laate the
ab milte hain jab bhi fursat hoti hai

main baDaa ho gayaa huun magar bachpanaa
mere dil se kabhi bhi gayaa hi nahin

tere baare mein agar khaamosh huun main aaj tak
phir tire haq mein kisi kaa faisla kaise huaa

milte ho to ab tum bhi bahut rahte ho khaamosh
kyaa tum ko bhi ab meri khabar hone lagi hai

jaa paDe chup ho ke jab shahr-e-khamoshaan mein 'nazir'
ye ghazal ye rekhta ye sher-khvaani phir kahaan

chup chup makaan raaste gum-sum niDhaal vaqt
is shahr ke liye koi divaanaa chaahiye

har ek baat ko chup-chaap kyuun sunaa jaae
kabhi to hausla kar ke nahin kahaa jaae