khamoshi mein har baat ban jaae hai — Kaleem Aajiz

gham hai to koi lutf nahin bistar-e-gul par
ji khush hai to kaanTon pe bhi aaraam bahut hai

ye tarz-e-khaas hai koi kahaan se laaegaa
jo ham kaheinge kisi se kahaa na jaaegaa

mausam-e-gul hamein jab yaad aayaa
jitnaa gham bhule the sab yaad aayaa

haan kuchh bhi to derina mohabbat kaa bharam rakh
dil se na aa duniyaa ko dikhaane ke liye aa

unhin ke giit zamaane mein gaae jaaeinge
jo choT khaaeinge aur muskuraae jaaeinge

ye aansu be-sabab jaari nahin hai
mujhe rone ki bimaari nahin hai

main baDaa ho gayaa huun magar bachpanaa
mere dil se kabhi bhi gayaa hi nahin

raat yuun dil mein tiri khoi hui yaad aai
jaise viraane mein chupke se bahaar aa jaae

baDi hasrat se insaan bachpane ko yaad kartaa hai
ye phal pak kar dobaara chaahtaa hai khaam ho jaae

tere kahne se chup nahin huun main
jaantaa huun ki bolnaa kab hai

duur tak ye raaste khaamosh hain
duur tak ham khud ko sunte jaaeinge

kyaa ajab log the guzre hain baDi shaan ke saath
raaste chup hain magar naqsh-e-qadam bolte hain