shor jitnaa hai kaaenaat mein shor — Kashif Husain Ghair

na ham vahshat mein apne ghar se nikle
na sahraa apni viraani se niklaa

bane hain kaam sab uljhan se mere
yahi atvaar hain bachpan se mere

zindagi mein kasak zaruri thi
ye khalaa pur tiri kami se huaa

haal puchhaa na kare haath milaayaa na kare
main isi dhuup mein khush huun koi saaya na kare

kyaa chaahti hai ham se hamaari ye zindagi
kyaa qarz hai jo ham se adaa ho nahin rahaa

mere andar kaa shor hai mujh mein
varna baahar to khaamushi hai yahaan

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

achchhi misaal bantin zaahir agar vo hotin
in nekiyon ko ham to dariyaa mein Daal aae

dil ki khalish to saath rahegi tamaam umr
dariyaa-e-gham ke paar utar jaaein ham to kyaa

DhunD rahaa hai dariyaa kis ko
roz kinaare TuuT rahe hain

jo zauq hai ki ho daryaaft aabru-e-sharaab
to chashm-e-jaam se ai shaikh dekh su-e-sharaab

qatre ki juraton ne sadaf se liyaa khiraaj
dariyaa samundaron mein mile aur mar gae