main ne har gaam use avval o aakhir jaanaa — Kausar Niyazi

har marhala-e-gham mein mili is se tasalli
har moD pe ghabraa ke tiraa naam liyaa hai

bar-sar-e-aam iqraar agar naa-mumkin hai to yunhi sahi
kam-az-kam idraak to kar le gun be-shak mat maan mire

haal-e-dil us ko sunaa kar hai bahut khush 'kausar'
lekin ab soch zaraa kyaa tiri auqaat rahi

chand lamhon ke liye ek mulaaqaat rahi
phir na vo tu na vo main aur na vo raat rahi

apne vahshat-zada kamre ki ik almaari mein
teri tasvir aqidat se sajaa rakkhi hai

jazbaat mein aa kar marnaa to mushkil si koi mushkil hi nahin
ai jaan-e-jahaan ham tere liye jiinaa bhi gavaaraa karte hain

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

zindagi sundar ghazal hai dosto
zindagi ko gungunaanaa chaahiye

yuun to qadam qadam pe hai divaar saamne
koi na ho to khud se ulajh jaanaa chaahiye

ye gum hue hain khayaal-e-visaal-e-jaanaan mein
ki ghar mein phirte hain ham apni justuju karte

vahaan se le gai naakaam badbakhton ko khud-kaami
jahaan chashm-e-karam se khud-ba-khud kuchh kaam honaa thaa