nahin hai koi bhi hatmi yahaan had-e-maalum — Khaavar Jilani

sabhi kirdaar thak kar so gae hain
magar ab tak kahaani chal rahi hai

vaqt guzar jaataa hai lekin dil ki ranjish
dil mein baiThi ki baiThi hi rah jaati hai

ik chingaari aag lagaa jaati hai ban mein aur kabhi
ek kiran se zulmat ko chhaT jaanaa paDtaa hai

jiinaa to alag baat hai marnaa bhi yahaan par
har shakhs ki apni hi zarurat ke liye hai

yunhi bekaar main paDaa khud ko
kaar-aamad banaa rahaa huun main

banne vaali baat vahi hoti hai vo jo
bante bante yaksar banti rah jaati hai

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

ret par ik nishaan hai shaayad
ye hamaaraa makaan hai shaayad