mujhe to un ki ibaadat pe rahm aataa hai — Khumar Barabankavi

gham hai na ab khushi hai na ummid hai na yaas
sab se najaat paae zamaane guzar gae

hairat hai tum ko dekh ke masjid mein ai 'khumaar'
kyaa baat ho gai jo khudaa yaad aa gayaa

mire raahbar mujh ko gumraah kar de
sunaa hai ki manzil qarib aa gai hai

yaad karne pe bhi dost aae na yaad
doston ke karam yaad aate rahe

jhunjhlaae hain lajaae hain phir muskuraae hain
kis ehtimaam se unhein ham yaad aae hain

duaa ye hai na hon gumraah ham-safar mere
'khumaar' main ne to apnaa safar tamaam kiyaa

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

tu bhi jaise badal saa jaataa hai
aks-e-divaar ke badalte hi

ham mein baaqi nahin ab khaalid-e-jaan-baaz kaa rang
dil pe ghaalib hai faqat hafiz-e-shiraaz kaa rang

kyaa karun ai dil-e-maayus zaraa ye to bataa
kyaa kiyaa karte hain sadmon se hiraasaan ho kar

ye havaa sard chali aur ye baadal aae
kaho saaqi se ki saaghar chale botal aae