dushmanon ko dost bhaai ko sitamgar kah diyaa — Laiq Aajiz

vo dhuup thi ki zamin jal ke raakh ho jaati
baras ke ab ke baDaa kaam kar gayaa paani

qalam uThaaun ki bachchon ki zindagi dekhun
paDaa huaa hai doraahe pe ab hunar meraa

khetiyaan chhaalon ki hoti thiin lahu ugte the
kitnaa zarkhez thaa vo dar-badari kaa mausam

ai mire paanv ke chhaalo mire ham-raah raho
imtihaan sakht hai tum chhoD ke jaate kyuun ho

mein chaahtaa huun ta'alluq ke darmiyaan parda
vo chaahtaa hai mire haal par nazar karnaa

shaam hote hi bujh gayaa 'aajiz'
ek muflis kaa khvaab thaa na rahaa

jab ki pahlu se yaar uThtaa hai
dard be-ikhtiyaar uThtaa hai

jo kahaa main ne ki pyaar aataa hai mujh ko tum par
hans ke kahne lagaa aur aap ko aataa kyaa hai

kyuun jal gayaa na taab-e-rukh-e-yaar dekh kar
jaltaa huun apni taaqat-e-didaar dekh kar

use main kyuun mohabbat se na dekhun
vo meraa pahlaa pahlaa pyaar Thahraa

na dastakein na sadaa kaun dar pe aayaa hai
faqir-e-shahr hai yaa shahryaar dekhiyegaa

pyaar apni jagah par ek shikaayat hai mujhe
tum ne aane mein bahut der ki aane vaale