ye haasil hai miri khaamoshiyon kaa — Madan Mohan Danish

ye naadaani nahin to kyaa hai 'daanish'
samajhnaa thaa jise samjhaa rahaa huun

jab apni be-kali se be-khudi se kuchh nahin hotaa
pukaarein kyon kisi ko ham kisi se kuchh nahin hotaa

achchhi raunaq hai tumhaari bazm mein
aa gae sab shahr ke barbaad kyaa

idhar kyaa kyaa ajube ho rahe hain
mariz-e-ishq achchhe ho rahe hain

aasmaan ki nazar se bachte hue
ik sitaara uThaa liyaa main ne

zindagi se mohabbat karo TuuT kar
maut kaa kaam dushvaar karte raho

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi