dast-e-pur-khun ko kaf-e-dast-e-nigaaraan samjhe — Majrooh Sultanpuri

'majruh' likh rahe hain vo ahl-e-vafaa kaa naam
ham bhi khaDe hue hain gunahgaar ki tarah

main ki ek mehnat-kash main ki tirgi-dushman
subh-e-nau ibaarat hai mere muskuraane se

tishnagi hi tishnagi hai kis ko kahiye mai-kada
lab hi lab ham ne to dekhe kis ko paimaana kahein

paara-e-dil hai vatan ki sarzamin mushkil ye hai
shahr ko viraan yaa is dil ko viraana kahein

be-tesha-e-nazar na chalo raah-e-raftagaan
har naqsh-e-paa buland hai divaar ki tarah

bahaane aur bhi hote jo zindagi ke liye
ham ek baar tiri aarzu bhi kho dete

jab ki pahlu se yaar uThtaa hai
dard be-ikhtiyaar uThtaa hai

chhin lenaa yaa-khudaa mujh se mire lauh-o-qalam
gar zavaal aae mire ashaar ke meaar mein

na puchh kaise guzarti hai zindagi ai dost
baDi tavil kahaani hai phir kabhi ai dost

kuchh log ibtidaa-e-rifaaqat se qabl hi
aainda ke har ek guzishta tak aa gae

dosti ishq aur vafaadaari
sakht jaan mein bhi narm goshe hain

dost ban ban ke mile mujh ko miTaane vaale
main ne dekhe hain kai rang zamaane vaale