mazkur jabki tere tabassum kaa aa paDaa — Maroof Dehlvi

dard-e-sar mein hai kise sandal lagaane kaa dimaagh
us kaa ghisnaa aur lagaanaa dard-e-sar ye bhi to hai

havaa ke ghoDe pe jab vo savaar hote hain
to paa ke vaqt main kyaa kyaa maze uDaataa huun

teri aankhon ke tasavvur mein hai sair-e-kaunain
varna ham log idhar ke idhar ho ke rahte

kaaba-o-dair ko apnaa to yahin se hai salaam
dar-ba-dar kaun phire yaar ke dar ke hote

ghaflat mein javaani gai piiri mein huaa hosh
kyuun kar na khule aankh sahar hi to hai aakhir

main ne aahein bharin to ruk ke kahaa
ghar mein dhuni si kyaa lagaa di hai

main baDaa ho gayaa huun magar bachpanaa
mere dil se kabhi bhi gayaa hi nahin

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

main badalte hue haalaat mein Dhal jaataa huun
dekhne vaale adaakaar samajhte hain mujhe

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai