yaadon ke qaafile mein udaasi thi ham-rikaab — Masood Tanha

bazm-e-yaaraan mein baiThtaa huun magar
meri jaanib harif dekhte hain

shahr mein raunaqein sahi 'tanhaa'
apne gaanv se mat kinaaraa kar

dost hi khubiyaan bataate hain
dost hi khaamiyaan nikaalte hain

ye tamaashaa sar-e-baazaar nahin ho saktaa
har koi meraa kharidaar nahin ho saktaa

dasht-e-ghurbat mein ham-safar na banaa
ham kai mehrbaan chhoD aae

bahut khaamosh rahtaa hai jo 'tanhaa'
vo mahfil mein baraabar boltaa hai

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

haasil-e-gham yahi samajhte hain
maut ko zindagi samajhte hain

aadmiyat ke sivaa jis kaa koi maqsad na ho
umr bhar us aadmi ki justuju karte raho