munh-zabaani quraan paDhte the — Mohammad Alvi

main us ke badan ki muqaddas kitaab
nihaayat aqidat se paDhtaa rahaa

kamre mein maze ki raushni ho
achchhi si koi kitaab dekhun

nayaa saal divaar par Taang de
puraane baras kaa calendar giraa

aur baazaar se kyaa le jaaun
pahli baarish kaa mazaa le jaaun

donon ke dil mein khauf thaa maidaan-e-jang mein
donon kaa khauf faasla thaa darmiyaan kaa

us se bichhaDte vaqt main royaa thaa khub-saa
ye baat yaad aai to pahron hansaa kiyaa

main baDaa ho gayaa huun magar bachpanaa
mere dil se kabhi bhi gayaa hi nahin

umr hi teri guzar jaaegi un ke hal mein
teraa bachcha jo savaalaat liye baiThaa hai

muqaddas muskuraahaT maan ke honTon par larazti hai
kisi bachche kaa jab pahlaa sipaara khatm hotaa hai

hazaaron sher mere so gae kaaghaz ki qabron mein
ajab maan huun koi bachcha miraa zinda nahin rahtaa

vo maathaa kaa matla ho ki honThon ke do misre
bachpan se ghazal hi meri mahbuba rahi hai

log kahte hain hamesha chaand saa mahbub ko
bhuke bachche ko magar roTi lagi hai chaand si