ab duaaon ke liye uThte nahin hain haath bhi — Mohsin Ehsan

tanhaa khaDaa huun main bhi sar-e-karbalaa-e-asr
aur sochtaa huun mere taraf-daar kyaa hue

main munaqqash huun tiri ruuh ki divaaron par
tu miTaa saktaa nahin bhulne vaale mujh ko

subh se shaam hui ruThaa huaa baiThaa huun
koi aisaa nahin aa kar jo manaa le mujh ko

main kharch kaar-e-zamaana mein ho chukaa itnaa
ki aakhirat ke liye paas kuchh bachaa hi nahin

gham hai na ab khushi hai na ummid hai na yaas
sab se najaat paae zamaane guzar gae

uThaa hi laayaa sabhi raaste vo kaandhon par
yaqin us pe na kartaa to main kidhar jaataa

nahin nahin main bahut khush rahaa huun tere baghair
yaqin kar ki ye haalat abhi abhi hui hai

naama-bar naa-umid aataa hai
haae kyaa sust paanv paDte hain

aaj phir bujh gae jal jal ke umidon ke charaagh
aaj phir taaron bhari raat ne dam toD diyaa

hazaaron paikar-e-ummid nazron se hue ojhal
jo kuchh baaqi rahe the vo bhi pinhaan hote jaate hain