sarson jo phuli dida-e-jaam-e-sharaab mein — Muneer Shikohabadi

ham-rang ki hai duun nikal ashrafi ke saath
paataa hai aa ke rang-e-talaai yahaan basant

aankhon mein nahin silsila-e-ashk shab-o-roz
tasbih paDhaa karte hain din raat tumhaari

us but ke nahaane se huaa saaf ye paani
moti bhi sadaf mein tah-e-dariyaa nazar aayaa

chehra tamaam surkh hai mahram ke rang se
angiyaa kaa paan dekh ke munh laal ho gayaa

ho gayaa maamur aalam jab kiyaa darbaar-e-aam
takhliya chaahaa to duniyaa saaf khaali ho gai

kibr bhi hai shirk ai zaahid muvahhid ke huzur
le ke tesha khaaksaari kaa but-e-pindaar toD

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

sainkaDon dilkash bahaarein thiin hamaari muntazir
ham tiri khvaahish mein lekin Thokarein khaate rahe

ab itnaa aql se begaana ho gayaa huun main
gulon ke shikve sitaaron se kah rahaa huun main

is dafa to zindagi jaldi mein thi
kah do agli baar fursat mein mile