mere maahaul mein har samt bure log nahin — Muzaffar Razmi

is raaz ko kyaa jaanein saahil ke tamaashaai
ham Duub ke samjhe hain dariyaa tiri gahraai

mujh ko haalaat mein uljhaa huaa rahne de yunhi
main tiri zulf nahin huun jo sanvar jaaungaa

mere daaman mein agar kuchh na rahegaa baaqi
agli naslon ko duaa de ke chalaa jaaungaa

koi saughaat-e-vafaa de ke chalaa jaaungaa
tujh ko jiine ki adaa de ke chalaa jaaungaa

ye jabr bhi dekhaa hai taarikh ki nazron ne
lamhon ne khataa ki thi sadiyon ne sazaa paai

qarib aao to shaayad samajh mein aa jaae
ki faasle to ghalat-fahmiyaan baDhaate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

maarka garm to ho lene do khun-rezi kaa
pahle shamshir ke niche hamin jaa baiTheinge