koi saughaat-e-vafaa de ke chalaa jaaungaa — Muzaffar Razmi

ye jabr bhi dekhaa hai taarikh ki nazron ne
lamhon ne khataa ki thi sadiyon ne sazaa paai

khud pukaaregi jo manzil to Thahar jaaungaa
varna khuddaar musaafir huun guzar jaaungaa

mere maahaul mein har samt bure log nahin
kuchh bhale bhi mire hamraah chale aate hain

is raaz ko kyaa jaanein saahil ke tamaashaai
ham Duub ke samjhe hain dariyaa tiri gahraai

mujh ko haalaat mein uljhaa huaa rahne de yunhi
main tiri zulf nahin huun jo sanvar jaaungaa

mere daaman mein agar kuchh na rahegaa baaqi
agli naslon ko duaa de ke chalaa jaaungaa

is qadar musalsal thiin shiddatein judaai ki
aaj pahli baar us se main ne bevafaai ki

taazgi hai sukhan-e-kuhna mein ye baad-e-vafaat
log aksar mire jiine kaa gumaan rakhte hain

apni kashti kaa hai khudaa haafiz
pichhe tufaan hai saamne girdaab

ye jafaaon ki sazaa hai ki tamaashaai hai tu
ye vafaaon ki sazaa hai ki pae-daar huun main

kuchh to majburiyaan rahi hongi
yuun koi bevafaa nahin hotaa

mere baa'd vafaa kaa dhokaa aur kisi se mat karnaa
gaali degi duniyaa tujh ko sar meraa jhuk jaaegaa