ehsaas-e-tirgi thaa use raushni ke baad — Nawab Ahsan

jab bhi lauTaa gaanv ke baazaar se
mujh ko sab bachchon ne dekhaa pyaar se

bikhre hue khvaabon ki vo tasvir hai shaayad
ab ye bhi nahin yaad kahaan us se milaa thaa

shab-e-firaaq ki tanhaaiyon mein teraa khayaal
mire vajud se kartaa rahaa judaa mujh ko

khauf-o-dahshat se lab nahin khulte
varna qaatil miri nigaah mein hai

us ne to chhinaa thaa mere jism se meraa libaas
jab pahan kar us ne dekhaa to qabaa Dhili mili

shaikh mujh ko na Daraa apni musalmaani thaam
ham faqiron kaa kisi rang se imaan na jaae

aisi taraqqi par to ronaa bantaa hai
jis mein dahshat-gard corona bantaa hai

nahin milti unhein manzil jinhein khauf-e-havaadis hai
jo maujon se nahin Darte nadi ko paar karte hain

khauf aisaa hai ki duniyaa ke sataae hue log
kabhi mimbar kabhi mehraab se Dar jaate hain

baazaar hain khaamosh to galiyon pe hai sakta
ab shahr mein tanhaai kaa Dar bol rahaa hai

mere taayaa se vo hain umr mein das saal baDi
ghar ke har fard pe dahshat hai miri taai ki