aae to dil thaa baagh baagh aur gae to daagh daagh — Nazeer Siddiqui

jis darja nek hone ki milti rahi hai daad
us darja nek banne kaa armaan kabhi na thaa

raat se shikaayat kyaa bas tumhin se kahnaa hai
tum zaraa Thahar jaao raat kab Thaharti hai

abhi se vo daaman chhuDaane lage ho
jo ab tak mire haath aayaa nahin hai

aur hi vo log hain jin ko hai yazdaan ki talaash
mujh ko insaanon ki duniyaa mein hai insaan ki talaash

kisi ki mehrbaani se mohabbat mutmain kyaa ho
mohabbat to mohabbat se bhi aasuda nahin hoti

ham se shikaayatein bajaa ham ko bhi hai magar gila
pahle se ham nahin agar pahle se aap bhi nahin

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

bazm-e-falak mein kaun hai us ki raa'naai kaa mahram-e-raaz
kis ko apne daaman-e-dil ke daagh dikhaaegaa mahtaab

dil ki hi kisi baat ko tahrir na kar paae
likhne pe jab aae the to kyaa kyaa nahin likkhaa

chashm-e-dilbar ne dil-e-zaar ki dildaari ki
aah bimaar ne bimaar ki gham-khvaari ki

gunjaaish-e-do-shaah nahin ek mulk mein
vahdaaniyat ke haq ki yahi bas dalil hai