chaahiye thi shama is taarik ghar ke vaaste — Nooh Narvi

dil unhein deinge magar ham deinge in sharton ke saath
aazmaa kar jaanch kar sun kar samajh kar dekh kar

jab zikr kiyaa main ne kabhi vasl kaa un se
vo kahne lage paak mohabbat hai baDi chiiz

vo haath mein talvaar liye sar pe khaDe hain
marne nahin deti mujhe marne ki khushi aaj

jo ahl-e-zauq hain vo lutf uThaa lete hain chal phir kar
gulistaan kaa gulistaan mein bayaabaan kaa bayaabaan mein

koi yahaan se chal diyaa raunaq-e-baam-o-dar nahin
dekh rahaa huun ghar ko main ghar hai magar vo ghar nahin

nuuh baiThe hain chaarpaai par
chaarpaai pe nuuh baiThe hain

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ab to bimaar-e-mohabbat tere
qaabil-e-ghaur hue jaate hain

na dekh mujh ko mohabbat ki aankh se ai dost
miraa vajud miraa muddaaa na ho jaae

pyaari surat vo haae kyaa hogi
jis ko be-dekhe pyaar aataa hai

Dubne ki na tairne ki khabar
ishq-dariyaa mein bas utar dekhun