diyaa khaamosh hai lekin kisi kaa dil to jaltaa hai — Nushur Wahidi

duniyaa ki bahaaron se aankhein yuun pher liin jaane vaalon ne
jaise koi lambe qisse ko paDhte paDhte uktaa jaae

hazaar shama farozaan ho raushni ke liye
nazar nahin to andheraa hai aadmi ke liye

khaak aur khuun se ik shama jalaai hai 'nushur'
maut se ham ne bhi sikhi hai hayaat-aaraai

sarak kar aa gaiin zulfein jo in makhmur aankhon tak
main ye samjhaa ki mai-khaane pe badli chhaai jaati hai

qadam mai-khaana mein rakhnaa bhi kaar-e-pukhta-kaaraan hai
jo paimaana uThaate hain vo tharraayaa nahin karte

aghyaar ko gul-pairahani ham ne ataa ki
apne liye phulon kaa kafan ham ne banaayaa

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

raat guzre na dard-e-dil Thahre
kuchh to baDh jaae kuchh to ghaT jaae

aankh nam rukh par udaasi dard bhi dil ke qarib
kyaa mohabbat aa gai hai apni manzil ke qarib

nikle the donon bhes badal ke to kyaa ajab
main DhunDtaa khudaa ko phiraa aur khudaa mujhe

dulhan ki mehndi jaisi hai urdu zabaan ki shakl
khushbu bikhertaa hai ibaarat kaa harf harf