aghyaar ko gul-pairahani ham ne ataa ki — Nushur Wahidi

hazaar shama farozaan ho raushni ke liye
nazar nahin to andheraa hai aadmi ke liye

khaak aur khuun se ik shama jalaai hai 'nushur'
maut se ham ne bhi sikhi hai hayaat-aaraai

diyaa khaamosh hai lekin kisi kaa dil to jaltaa hai
chale aao jahaan tak raushni maalum hoti hai

sarak kar aa gaiin zulfein jo in makhmur aankhon tak
main ye samjhaa ki mai-khaane pe badli chhaai jaati hai

qadam mai-khaana mein rakhnaa bhi kaar-e-pukhta-kaaraan hai
jo paimaana uThaate hain vo tharraayaa nahin karte

duniyaa ki bahaaron se aankhein yuun pher liin jaane vaalon ne
jaise koi lambe qisse ko paDhte paDhte uktaa jaae

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

jab ki pahlu se yaar uThtaa hai
dard be-ikhtiyaar uThtaa hai

kaabe ko jaataa kis liye hindostaan se main
kis but mein shahr-e-hind ke shaan-e-khudaa na thi

baat karnaa pyaar ki aasaan se aasaan hai
ishq karnaa karte rahnaa hai kaThin se bhi kaThin

yaad aai hai to phir TuuT ke yaad aai hai
koi guzri hui manzil koi bhuli hui dost

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh