raat ke lamhaat khuni daastaan likhte rahe — Nusrat Gwaliari

milnaa paDtaa hai hamein khud se bhi ghairon ki tarah
us ne maahaul hi kuchh aisaa banaa rakkhaa hai

qaanun jaise kho chukaa sadiyon kaa e'timaad
ab kaun dekhtaa hai khataa kaa hai rukh kidhar

main ajnabi huun magar tum kabhi jo sochoge
koi qarib kaa rishta zarur niklegaa

husn utnaa ek paikar main simaT saktaa nahin
tu bhi mere hi kisi ehsaas ki tasvir hai

kuchh ehtiyaat parinde bhi rakhnaa bhuul gae
kuchh intiqaam bhi aandhi ne badtarin liye

vo gulaabi baadalon mein ek niili jhiil si
hosh qaaem kaise rahte thaa hi kuchh aisaa libaas

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

aaine se nazar churaate hain
jab se apnaa javaab dekhaa hai

jahaan jahaan bhi hai nahr-e-furaat kaa imkaan
vahin yazid kaa lashkar dikhaai detaa hai

tangi-e-haiat se Takraataa huaa josh-e-mavaad
shaaeri kaa lutf aa jaataa hai chhoTi bahr mein