hatheliyon ki duaa phuul ban ke aai ho — Parveen Shakir

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

main sach kahungi magar phir bhi haar jaaungi
vo jhuuT bolegaa aur laa-javaab kar degaa

vo kahin bhi gayaa lauTaa to mire paas aayaa
bas yahi baat hai achchhi mire harjaai ki

laDkiyon ke dukh ajab hote hain sukh us se ajiib
hans rahi hain aur kaajal bhigtaa hai saath saath

tujhe manaaun ki apni anaa ki baat sunun
ulajh rahaa hai mire faislon kaa resham phir

ab to is raah se vo shakhs guzartaa bhi nahin
ab kis ummid pe darvaaze se jhaanke koi

mere daaman mein agar kuchh na rahegaa baaqi
agli naslon ko duaa de ke chalaa jaaungaa

jaane kab kaun se lamhe mein zarurat paD jaae
tum hamaare liye pahle se duaa kar rakhnaa

us maraz ko maraz-e-ishq kahaa karte hain
na davaa hoti hai jis ki na duaa hoti hai

is liye chal na sakaa koi bhi khanjar mujh par
meri shah-rag pe miri maan ki duaa rakkhi thi

na chaaraagar ki zarurat na kuchh davaa ki hai
duaa ko haath uThaao ki gham ki raat kaTe

palak fasaana sharaarat hijaab tiir duaa
tamannaa niind ishaara khumaar sakht thaki