ji chaahtaa hai haath lagaa kar bhi dekh lein — Prem Kumar Nazar

aaegi har taraf se havaa dastakein liye
unchaa makaan banaa ke bahut khiDkiyaan na rakh

rakh di hai us ne khol ke khud jism ki kitaab
saada varaq pe le koi manzar utaar de

usi ke zikr se ham shahr mein hue badnaam
vo ek shakhs ki jis se hamaari bol na chaal

lafz chhin jaaein magar tahrir ho raushan jahaan
honT hon khaamosh lekin guftugu baaqi rahe

ek angDaai se saare shahr ko niind aa gai
ye tamaashaa main ne dekhaa baam par hotaa huaa

bahut lambi masaafat hai badan ki
musaafir mubtadi thakne lagaa hai

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

gulaabon ke honTon pe lab rakh rahaa huun
use der tak sochnaa chaahtaa huun

dil is tarah havaa-e-mohabbat mein jal gayaa
bhaDki kahin na aag na uTThaa dhuaan kahin

mire siine se lag kar der tak roti hai tanhaai
kisi ne kah diyaa us se mohabbat ho gai mujh ko