bain karti hui samton se na Darnaa 'baani' — Rajinder Manchanda Bani

yaad tiri jaise ki sar-e-shaam
dhund utar jaae paani mein

thi paanv mein koi zanjir bach gae varna
ram-e-havaa kaa tamaashaa yahaan rahaa hai bahut

koi bhuli hui shai taaq-e-har-manzar pe rakkhi thi
sitaare chhat pe rakkhe the shikan bistar pe rakkhi thi

shaamil huun qaafile mein magar sar mein dhund hai
shaayad hai koi raah judaa bhi mire liye

paiham mauj-e-imkaani mein
aglaa paanv nae paani mein

mohabbatein na rahin us ke dil mein mere liye
magar vo miltaa thaa hans kar ki vaza-daar jo thaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

yuun to maujud apne ghar mein hai
aadmi mustaqil safar mein hai

safar mein aise kai marhale bhi aate hain
har ek moD pe kuchh log chhuT jaate hain

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yaqinan rahbar-e-manzil kahin par raastaa bhulaa
vagarna qaafile ke qaafile gum ho nahin sakte