itni pi hai ki baad-e-tauba bhi — Riyaz Khairabadi

mai-khaane mein mazaar hamaaraa agar banaa
duniyaa yahi kahegi ki jannat mein ghar banaa

aap aae to khayaal-e-dil-e-naashaad aayaa
aap ne yaad dilaayaa to mujhe yaad aayaa

ghurur bhi jo karun main to aajizi ho jaae
khudi mein lutf vo aae ki be-khudi ho jaae

ham jaante hain lutf-e-taqaazaa-e-mai-farosh
vo naqd mein kahaan jo mazaa hai udhaar mein

baDe paak tinat baDe saaf baatin
'riyaaz' aap ko kuchh hamin jaante hain

aisi hi intizaar mein lazzat agar na ho
to do ghaDi firaaq mein apni basar na ho

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

un baaton par mat jaanaa jo 'aam huiin
dekho kitni sachchaai hai aankhon mein

talaatum aarzu mein hai na tufaan justuju mein hai
javaani kaa guzar jaanaa hai dariyaa kaa utar jaanaa

pi liyaa karte hain jiine ki tamannaa mein kabhi
laDkhaDaanaa bhi zaruri hai sambhalne ke liye

ye lamha lamha takalluf ke TuTte rishte
na itne paas mire aa ki tu puraanaa lage