gham-e-dauraan ko baDi chiiz samajh rakkhaa thaa — Saba Akbarabadi

samjhegaa aadmi ko vahaan kaun aadmi
banda jahaan khudaa ko khudaa maantaa nahin

bhiiD tanhaaiyon kaa melaa hai
aadmi aadmi akelaa hai

aap aae hain so ab ghar mein ujaalaa hai bahut
kahiye jalti rahe yaa shama bujhaa di jaae

kab tak najaat paaeinge vahm o yaqin se ham
uljhe hue hain aaj bhi duniyaa o diin se ham

achchhaa huaa ki sab dar-o-divaar gir paDe
ab raushni to hai mire ghar mein havaa to hai

apne jalne mein kisi ko nahin karte hain sharik
raat ho jaae to ham shama bujhaa dete hain

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

koi shikva na gham na koi yaad
baiThe baiThe bas aankh bhar aai

hamaare she'r naghme aur sajde
adaa jo ho na paae kyaa hue vo

main phir rahaa huun shahr mein saDkon pe ghaaliban
aavaaz de ke mujh ko miraa ghar pukaar le