chilchilaati-dhup thi lekin thaa saaya ham-qadam — Sabir

fasl boi bhi ham ne kaaTi bhi
ab na kahnaa zamin banjar hai

us ke shar se main sadaa maangtaa rahtaa huun panaah
isi duniyaa se mohabbat bhi balaa ki hai mujhe

hans hans ke us se baatein kiye jaa rahe ho tum
'saabir' vo dil mein aur hi kuchh sochtaa na ho

tire tasavvur ki dhuup oDhe khaDaa huun chhat par
mire liye sardiyon kaa mausam zaraa alag hai

ye kaarobaar-e-mohabbat hai tum na samjhoge
huaa hai mujh ko bahut faaeda khasaare mein

ham us ki khaatir bachaa na paaeinge umr apni
fuzul-kharchi ki ham ko aadat si ho gai hai

mohabbat karne vaale dard mein tanhaa nahin hote
jo ruThoge kabhi mujh se to apnaa dil dukhaaoge

vo ek pal ki rifaaqat bhi kyaa rifaaqat thi
jo de gai hai mujhe umar bhar ki tanhaai

kaav kaav-e-sakht-jaani haae-tanhaai na puchh
subh karnaa shaam kaa laanaa hai ju-e-shir kaa

hai aadmi bajaae khud ik mahshar-e-khayaal
ham anjuman samajhte hain khalvat hi kyuun na ho

laD rahaa huun main akelaa kaar-zaar-e-hast mein
kar faraaham tu bhi zaalim apne hone kaa javaaz

hai yahaan kis ko dimaagh anjuman-aaraai kaa
apne rahne ko makaan chaahiye tanhaai kaa