Ghalib

puchhte hain vo ki 'ghaalib' kaun hai
koi batlaao ki ham batlaaein kyaa

phir usi bevafaa pe marte hain
phir vahi zindagi hamaari hai

dil hi to hai siyaasat-e-darbaan se Dar gayaa
main aur jaaun dar se tire bin sadaa kiye

shaahid-e-hasti-e-mutlaq ki kamar hai aalam
log kahte hain ki hai par hamein manzur nahin

harif-e-matlab-e-mushkil nahin fusun-e-niyaaz
duaa qubul ho yaa rab ki umr-e-khizr daraaz!

tum jaano tum ko ghair se jo rasm-o-raah ho
mujh ko bhi puchhte raho to kyaa gunaah ho

thaa zindagi mein marg kaa khaTkaa lagaa huaa
uDne se pesh-tar bhi miraa rang zard thaa

ghair lein mahfil mein bose jaam ke
ham rahein yuun tishna-lab paighaam ke

qatra apnaa bhi haqiqat mein hai dariyaa lekin
ham ko taqlid-e-tunuk-zarfi-e-mansur nahin

saadgi o purkaari be-khudi o hushyaari
husn ko taghaaful mein jurat-aazmaa paayaa

letaa huun maktab-e-gham-e-dil mein sabaq hanuz
lekin yahi ki raft gayaa aur buud thaa

sab kahaan kuchh laala-o-gul mein numaayaan ho gaiin
khaak mein kyaa suratein hongi ki pinhaan ho gaiin

had chaahiye sazaa mein uqubat ke vaaste
aakhir gunaahgaar huun kaafar nahin huun main

ne tiir kamaan mein hai na sayyaad kamin mein
goshe mein qafas ke mujhe aaraam bahut hai

dil-e-naadaan tujhe huaa kyaa hai
aakhir is dard ki davaa kyaa hai

taab laae hi banegi 'ghaalib'
vaaqia sakht hai aur jaan aziiz

gham-e-firaaq mein taklif-e-sair-e-baagh na do
mujhe dimaagh nahin khanda-haa-e-bejaa kaa

dost-daar-e-dushman hai e'timaad-e-dil maalum
aah be-asar dekhi naala naa-rasaa paayaa

allaah re zauq-e-dasht-navardi ki baad-e-marg
hilte hain khud-ba-khud mire andar kafan ke paanv

gunjaaish-e-adaavat-e-aghyaar yak taraf
yaan dil mein zof se havas-e-yaar bhi nahin