aaina chupke se manzar vo churaa letaa hai — Sarfraz Nawaz

tumhaare sach ki hifaazat mein yuun huaa akasr
ki apne-aap ko jhuTaa banaa liyaa main ne

ishq adab hai to apne aap aae
gar sabaq hai to phir paDhaa mujh ko

be-sadaa si kisi aavaaz ke pichhe pichhe
chalte chalte main bahut duur nikal jaataa huun

khudaa kare ki vahi baat us ke dil mein ho
jo baat kahne ki himmat juTaa rahaa huun main

safar kahaan se kahaan tak pahunch gayaa meraa
ruke jo paanv to kaandhon pe jaa rahaa huun main

mire baghair koi tum ko DhunDtaa kaise
tumhein pata hai tumhaaraa pata rahaa huun main

main baDaa ho gayaa huun magar bachpanaa
mere dil se kabhi bhi gayaa hi nahin

vufur-e-gham se machal rahe the dil-e-hazin mein hazaar shikve
ye kyaa khabar thi ki vaqt-e-pursish sukut mein Duub jaaungaa main

hamaare biich vo chup-chaap baiThaa rahtaa hai
main sochtaa huun magar kuchh mujhe pataa na lage

mire kalaam se behtar hai meri khaamoshi
na jaane kitne savaalon ki aabru rakh li

bachpan ne hamein di hai ye shirini-e-guftaar
urdu nahin ham maan ki zabaan bol rahe hain

meri khaamoshi pe the jo taana-zan
shor mein apne hi bahre ho gae