kahaani hai to itni hai fareb-e-khvaab-e-hasti ki — Seemab Akbarabadi

dekhte rahte hain chhup-chhup ke muraqqaa teraa
kabhi aati hai havaa bhi to chhupaa lete hain

tujhe daanista mahfil mein jo dekhaa ho to mujrim huun
nazar aakhir nazar hai be-iraada uTh gai hogi

manzil mili muraad mili muddaaa milaa
sab kuchh mujhe milaa jo tiraa naqsh-e-paa milaa

khudaa aur naakhudaa mil kar Dubo dein ye to mumkin hai
meri vajh-e-tabaahi sirf tufaan ho nahin saktaa

dekhte hi dekhte duniyaa se main uTh jaaungaa
dekhti ki dekhti rah jaaegi duniyaa mujhe

chamak jugnu ki barq-e-be-amaan maalum hoti hai
qafas mein rah ke qadr-e-aashiyaan maalum hoti hai

muqaddar se mire donon ke donon bevafaa nikle
na umr-e-bevafaa palTi na phir jaa kar shabaab aayaa

nigaah-e-naaz ki maasumiyat are tauba
jo ham fareb na khaate to aur kyaa karte

gin rahaa huun harf un ke ahd ke
mujh ko dhokaa de rahi hai yaad kyaa

jo baat dil mein thi us se nahin kahi ham ne
vafaa ke naam se vo bhi fareb khaa jaataa

do gaz zamin fareb-e-vatan ke liye mili
vaise to aasmaan bhi bahut hain zamin bahut

mere alaava use khud se bhi mohabbat hai
aur aisaa karne se vo bevafaa nahin hoti