naqsh-e-hairat ban gai duniyaa sitaaron ki tarah — Shahzad Ahmad

shaayad isi baais huiin patthar miri aankhein
jo kuchh ki mujhe dekhnaa thaa dekh liyaa hai

zabaanein thak chukin patthar hue kaan
kahaani an-kahi thi an-kahi hai

ek se manzar dekh dekh kar aankhein dukhne lagti hain
is raste par peD bahut hain aur haraa koi bhi nahin

khule asraar us par jism ke aahista aahista
bahut din mein use baatein na karne kaa hunar aayaa

bharpur nahin hain kisi chehre ke khad-o-khaal
dekhaa nahin vo chaand jo puuraa nazar aae

ab to insaan ki azmat bhi koi chiiz nahin
log patthar ko khudaa maan liyaa karte the

shab-e-vaada fasil-e-hijr se aage chamaktaa hai tiraa ism-e-sitaara-ju
ki jaise koi paivand-e-ridaa-e-subh aa jaae kisi qindil ki zad mein

hijr mein ik maah ke aansu hamaare gir paDe
aasmaan TuuTaa shab-e-furqat sitaare gir paDe

zarra samajh ke yuun na milaa mujh ko khaak mein
ai aasmaan main bhi kabhi aaftaab thaa

agar vo chaand ki basti kaa rahne vaalaa thaa
to apne saath sitaaron kaa qaafila rakhtaa

muddat se rahi farsh tiri raahguzar mein
tab jaa ke sitaaron se kahin aankh laDi hai

thaam rakkhi hai ham ne chaal apni
aaj-kal hain sitaare gardish mein