isi khataa pe bujhaae gae charaagh mire — Shakeel Azmi

apni manzil pe pahunchnaa bhi khaDe rahnaa bhi
kitnaa mushkil hai baDe ho ke baDe rahnaa bhi

khud ko itnaa bhi mat bachaayaa kar
baarishein hon to bhiig jaayaa kar

main so rahaa huun tire khvaab dekhne ke liye
ye aarzu hai ki aankhon mein raat rah jaae

jaane kaisaa rishta hai rahguzar kaa qadmon se
thak ke baiTh jaaun to raasta bulaataa hai

baat se baat ki gahraai chali jaati hai
jhuuT aa jaae to sachchaai chali jaati hai

haar ho jaati hai jab maan liyaa jaataa hai
jiit tab hoti hai jab Thaan liyaa jaataa hai

kyon tasavvur mein ji rahaa huun main
jab haqiqat mein mar hi jaanaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

main paa sakaa na kabhi is khalish se chhuTkaaraa
vo mujh se jiit bhi saktaa thaa jaane kyuun haaraa

har baar hi main jaan se jaane mein rah gayaa
main rasm-e-zindagi jo nibhaane mein rah gayaa