do paanv hain jo haar ke ruk jaate hain — Suhail Ahmed Zaidi

ham haar to jaate hi ki dushman ke hamaare
sau pair the sau haath the ik sar hi nahin thaa

ham ne to muund liin aankhein hi tiri diid ke baad
bul-havas jaante hain koi hasin kitnaa hai

dekho to har ik shakhs ke haathon mein hain patthar
puchho to kahin shahr banaane ke liye hai

har subh apne ghar mein usi vaqt jaagnaa
aazaad log bhi to giraftaar se rahe

peD unchaa hai magar zer-e-zamin kitnaa hai
lab pe hai naam-e-khudaa dil mein yaqin kitnaa hai

kabhi to lagtaa hai gumraah kar gai mujh ko
sukhan-vari kabhi paighambari si lagti hai

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

dam nikaltaa hai tiri zulf ke saudaai kaa
jhilmilaataa hai sitaara shab-e-tanhaai kaa

jis tarah ham ne raatein kaaTi hain
us tarah ham ne din guzaare hain