hamaari saada-mizaaji pe rashk karte hain — Sultan Akhtar

ik khauf-e-be-panaah hai aankhon ke aar-paar
taarikiyon mein Dubtaa lamha hai saamne

safar safar mire qadmon se jagmagaayaa huaa
taraf taraf hai miri khaak-e-justuju raushan

main vo sahraa jise paani ki havas le Duubi
tu vo baadal jo kabhi TuuT ke barsaa hi nahin

fursat mein rahaa karte hain fursat se zyaada
masruf hain ham log zarurat se zyaada

saamne aankhon ke phir yakh-basta manzar aaegaa
dhuup jam jaaegi aangan mein december aaegaa

sab ke honTon pe munavvar hain hamaare qisse
aur ham apni kahaani bhi nahin jaante hain

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

aasmaan jhaank rahaa hai 'khaalid'
chaand kamre mein mire utraa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi