iid ke baa'd vo milne ke liye aae hain — Unknown

log kaanTon se bach ke chalte hain
main ne phulon se zakhm khaae hain

dil TuTne se thoDi si taklif to hui
lekin tamaam umr ko aaraam ho gayaa

duniyaa mein vahi shakhs hai taazim ke qaabil
jis shakhs ne haalaat kaa rukh moD diyaa ho

miri namaaz-e-janaaza paDhi hai ghairon ne
mare the jin ke liye vo rahe vazu karte

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain

jin ke kirdaar se aati ho sadaaqat ki mahak
un ki tadris se patthar bhi pighal sakte hain

vo chaand hai to aks bhi paani mein aaegaa
kirdaar khud ubhar ke kahaani mein aaegaa

bachchon ke chhoTe haathon ko chaand sitaare chhune do
chaar kitaabein paDh kar ye bhi ham jaise ho jaaeinge

chhup gayaa eid kaa chaand nikal kar der hui par jaane kyon
nazrein ab tak Tiki hui hain masjid ke minaaron par

muddaton baa'd kabhi ai nazar aane vaale
iid kaa chaand na dekhaa tiri surat dekhi

chaand ne taan li hai chaadar-e-abr
ab vo kapDe badal rahi hogi

paani mein bhi chaand sitaare ug aate hain
aankh se dil tak vo zarkhezi ho jaati hai