un se kah do mujhe khaamosh hi rahne de 'vasim' — Waseem Barelvi

ham ye to nahin kahte ki ham tujh se baDe hain
lekin ye bahut hai ki tire saath khaDe hain

tahrir se varna miri kyaa ho nahin saktaa
ik tu hai jo lafzon mein adaa ho nahin saktaa

raat to vaqt ki paaband hai Dhal jaaegi
dekhnaa ye hai charaaghon kaa safar kitnaa hai

bhare makaan kaa bhi apnaa nasha hai kyaa jaane
sharaab-khaane mein raatein guzaarne vaalaa

shartein lagaai jaati nahin dosti ke saath
kiije mujhe qubul miri har kami ke saath

hamaare ghar kaa pataa puchhne se kyaa haasil
udaasiyon ki koi shahriyat nahin hoti

main baDaa ho gayaa huun magar bachpanaa
mere dil se kabhi bhi gayaa hi nahin

raat yuun dil mein tiri khoi hui yaad aai
jaise viraane mein chupke se bahaar aa jaae

ghalat baaton ko khaamoshi se sunnaa haami bhar lenaa
bahut hain faaede is mein magar achchhaa nahin lagtaa

us dariche mein bhi ab koi nahin aur ham bhi
sar jhukaae hue chup-chaap guzar jaate hain

aankhon mein nami si hai chup chup se vo baiThe hain
naazuk si nigaahon mein naazuk saa fasaana hai

kis ki sadaa fazaaon mein gunji hai chaar-su
kis ne mujhe pukaaraa hai bachpan ke naam se