paDh chuke hain nisaab-e-tanhaai — Yashab Tamanna

karne ko kuchh nahin hai nae saal mein 'yashab'
kyon naa kisi se tark-e-mohabbat hi kijiye

samajh sakaa na use main qusur meraa hai
ki mere saamne to vo khuli kitaab rahaa

haqiqaton se mafar chaahi thi 'yashab' main ne
par asl asl rahaa aur khvaab khvaab rahaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

gae zamaane ki chaap jin ko samajh rahe ho
vo aane vaale udaas lamhon ki siskiyaan hain

nek guzre miri shab sidq-e-badan se tere
gham nahin raabta-e-subh jo kaazib Thahre

log hanste hain hamein dekh ke tanhaa tanhaa
aao baiThein kahin aur un pe hansein ham aur tum