baat pahunche samaaat ko taasir de kis tarah — Zafar Imam

jivan kaa sangit achaanak antim sur ko chhu letaa hai
hanstaa hi rahtaa hai phir bhi mere andar marne vaalaa

ik nadi mein saikDon dariyaa ki tughyaani mili
Dubne vaale ko mar jaane ki aasaani mili

saaf jazbon ke havaale se to gham hain lekin
ek lamhe ki khushi ek sadi rahti hai

jald manzil tak pahunchne kaa junun us ko rahaa
zindagi bhar is liye rasta badaltaa rah gayaa

dekh lete hain andhere mein bhi rasta apnaa
shama ehsaas ke maanind jali rahti hai

kyaa jaane kab dharti par sailaab kaa manzar ho jaae
har-dam ye majbur nigaahein varshaa karti rahti hain

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa