har baat dil ki lab pe nahin laanaa laazmi — Zyesha Usmaan

baDi viraani hai dil ke shajar par
mohabbat ke parinde uD gae kyaa

bujhne nahin diyaa ise furqat ke baa'd bhi
yaadon se teri dil ko farozaan rakhaa sadaa

log aaeinge bahut chhoD ke jaaeinge bahut
har kisi ko na kaleje se lagaa kar rakhiye

muflisi paanv ki zanjir thi aur
ru-ba-ru aa ke zarurat Thahri

kaisaa ye marhala hai ki ik dusre se ham
kahne ko aashnaa hain magar aashnaa nahin

ai shakhs tujh se tark-e-ta'alluq kaa gham nahin
gham ye hai main ne khud ko tire saath kho diyaa

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

jab bhi aql banaati hai pahlaa misraa
dil ko misra-e-saani honaa paDtaa hai

aql kahti hai dobaara aazmaanaa jahl hai
dil ye kahtaa hai fareb-e-dost khaate jaaiye

kisi ki yaad manaane mein iid guzregi
so shahr-e-dil mein bahut duur tak udaasi hai

dil ke muaamle mein mujhe dakhl kuchh nahin
is ke mizaaj mein jidhar aae udhar rahe